Luke 6

INkosi YeSabatha

1Ngelinye iSabatha uJesu wayedabula emasimini alamabele, khonapho abafundi bakhe base bekhwebula amazimba amabele, baqhulula bahlikihla ezandleni badla izinhlamvu.

2Abanye abaFarisi babuza bathi, “Kungani lisenza okungaphandle komthetho ngeSabatha na?”

3UJesu wabaphendula wathi, “Kalikaze libale yini ngokwenziwa nguDavida labakhula bakhe lapho basebelambile? 4Wangena endlini kaNkulunkulu wathatha isinkwa esingcwelisiweyo wadla lokho umthetho owawusithi kudliwe ngabaphristi kuphela. Futhi okunye wakupha abakhula bakhe.” 5UJesu wasesithi kubo, “INdodana yoMuntu iyiNkosi yeSabatha.”

6Ngelinye iSabatha waya esinagogeni wafundisa, khonapho kulendoda elesandla sokudla esitshwabheneyo. 7AbaFarisi labafundisi bomthetho babedinga izaba lokubeka uJesu icala, yikho bamlinda ukubona ingabe wayezasilisa ngeSabatha.

8Kodwa uJesu wakwazi ababekucabanga, wasesithi endodeni yesandla esitshwabheneyo, “Sukuma ume phambi kwabantu bonke.” Lakanye yasukuma yema khonapho.

9UJesu wasesithi kubo, “Ngiyalibuza, yikuphi okusemthethweni ngelanga leSabatha: ukwenza okuhle kumbe ukwenza okubi, ukusindisa impilo kumbe ukuyibhubhisa?”

10Wabakhangela wababhoda bonke, wasesithi endodeni leyo, “Yelula isandla sakho.” Yenza njalo, isandla sayo sasiliswa ngokupheleleyo.

11Kodwa bazonda babheda basebecebisana ukuthi benzeni ngoJesu.

Abaphostoli Abalitshumi Lambili

12Ngelinye ilanga uJesu waphuma waya ewatheni lentaba esiya khuleka, waba khonale ubusuku bonke ekhuleka kuNkulunkulu. 13Kwathi sekusile wasebiza abafundi bakhe wakhetha kubo abalitshumi lambili, wasebaphawula ngokuthi ngabaphostoli: 14uSimoni (amutha wathi nguPhethro), lomfowabo uAndreya, uJakhobe, uJohane, uFiliphu, uBhatholomewu, 15uMathewu, uTomasi, uJakhobe umfoka Alifewu, uSimoni owayethiwa ngumZilothi, 16uJudasi umfokaJakhobe loJudasi Isikariyothi owaba ngumthengisi.

Izibusiso Lezithithibaliso

17Wehla labo bema esigcawini. Kwakubuthene ixuku elikhulu elabafundi bakhe njalo kulabantu abanengi bevela kulo lonke elaseJudiya, leJerusalema lasemakhunjini olwandle eThire leSidoni, 18ababeze ukuza muzwa lokuzakwelatshwa izifo zabo. Labo ababehlutshwa ngomoya ababi basiliswa, 19kwathi bonke abantu bazama ukumthinta ngoba amandla ayephuma kuye ebasilisa bonke.

20Wakhangela abafundi bakhe wathi: “Libusisiwe lina elimpofu, ngoba okwenu ngumbuso kaNkulunkulu.

21Libusisiwe lina elilambileyo manje, ngoba lizasuthiswa. Libusisiwe lina elililayo manje, ngoba lizahleka.

22Libusisiwe lina nxa abantu belizonda, nxa belibandlulula njalo belichothoza bephika ibizo lenu besithi lingcolile, ngenxa yeNdodana yoMuntu.

23“Thokozani ngalolosuku liqolotshe ngokuthokoza ngokuba mkhulu umvuzo wenu ezulwini. Ngokuba yiyo indlela oyise abaphatha ngayo abaphrofethi.

24“Kodwa maye kini lina elinothileyo, ngoba livele selikwamukele ukuhlala kuhle kwenu.

25Maye kini lina elidla kamnandi manje, ngoba lizalamba. Maye kini lina elihlekayo manje, ngoba lizakhala lilile.

26Maye kini nxa bonke abantu belincoma, ngoba yiyo indlela oyise abaphatha ngayo abaphrofethi bamanga.

Ukuthanda Izitha

27“Kodwa ngiyalitshela lina elingizwayo, ngithi: Thandani izitha zenu, yenzani okuhle kwabalizondayo,

28babusiseni labo abalithukayo, libathandazele labo abalichukuluzayo.

29Umuntu angakutshaya esihlathini sakho lesi, muphe lalesiyana. Umuntu angakwemuka ijazi lakho ungamaleli ukuthatha lebhatshi.

30Phanini loba ngubani ocelayo kini, njalo uma umuntu ethatha ulutho lwakho ungaluthonisi.

31Yenza kwabanye lokho ofuna ukuthi bakwenze kuwe.

32“Uma lithanda labo abalithandayo, lokho kulibuyiselani na? Lezoni lazo ziyabathanda abazithandayo. 33Njalo uma lisenza okuhle kulabo abalungileyo kini, lokho kulibuyiselani? Lezoni ziyakwenza lokho. 34Njalo uma liboleka labo elizazuza imbadalo kubo, lokho kulibuyiselani na? Lezoni ziboleka izoni zilindele ukubhadalwa ngokugcweleyo. 35Kodwa thandani izitha zenu, lizenzele okuhle, njalo lizeboleke lingalindeli lutho kuzo. Lapho-ke umvuzo wenu uzakuba mkhulu, njalo lizakuba ngamadodana akhe oPhezukonke, ngokuba ulomusa kwabangabongiyo labayizigangi. 36Wobani lesihawu njengoYihlo olesihawu.

Ukwahlulela Abanye

37“Lingehluleli, yikho lani kaliyikwehlulelwa. Lingamlahli omunye, yikhona lani lingayikulahlwa. Thethelelani, lani lizathethelelwa. 38Phanini, lani lizaphiwa. Kuzathiwa qithi kini kugcwaliswe phamu, kwabandezelwa, kwakhuhlu-zwa kwaze kwaphuphuma. Ngoba ngasonaleso silinganiso elisisebenzisayo, lani lizalinganiselwa ngaso.”

39Waphinde wabatshela umzekeliso lo: “Isiphofu kambe singakhokhela isiphofu na? Kabazukuwela emgodini bobabili na?

40Umfundi kamdluli umfundisi wakhe, kodwa wonke osefundiswe ngokupheleleyo usenjengomfundisi wakhe.

41“Kungani ukhangela ucezwana oluselihlweni lomfowenu na kodwa ungazidubi ngokhuni olukwelakho ilihlo na? 42Ungatsho njani kumfowenu uthi, ‘Mfowethu, akuthi ngikukhuphe ucezwana oluselihlweni lakho,’ kodwa wena ngokwakho usehluleka ukubona ukhuni elihlweni lakho na? Wena mzenzisi, qala ukhuphe ukhuni oluselihlweni lakho anduba ubone kuhle nxa usukhupha ucezwana elihlweni lomfowenu.

Isihlahla lezithelo zaso

43“Kakulasihlahla esihle esizala izithelo ezimbi, njalo lesihlahla esibi kasizali izithelo ezinhle. 44Yilesosihlahla saziwa ngezithelo zaso. Abantu kabakhi umkhiwa ezihlahleni zameva loba amagirebisi esingeni. 45Umuntu olungileyo uletha izinto ezinhle eziphuma kokuhle okulonjwe enhliziyweni yakhe, njalo lomuntu omubi uphihliza ububi obuphethuka enhliziyweni yakhe. Ngoba umlomo ukhuluma lokho okuphuphuma enhliziyweni.

Umakhi Ohlakaniphileyo Loyisiwula

46“Kungani lingibiza lisithi, ‘Nkosi, Nkosi’ kodwa lingakwenzi engikutshoyo? 47Ngizalitshengisa ukuthi ngonjani oza kimi ezwe amazwi ami enze akutshoyo. 48Unjengomuntu owayesakha indlu, owagebha phansi watshona wabeka isisekelo phezu kwedwala. Kwathi kufika isikhukhula umsinga wayitshaya indlu kodwa awaze wayizamazamisa, ngokuba yayakhiwe kuhle. 49Kodwa lowo owezwayo amazwi ami kodwa angakwenzi akutshoyo unjengomuntu owakha indlu emhlabathini kungelasisekelo. Umsinga wonela ukuyitshaya leyondlu yabhidlika yaphela du.”